ខេត្តត្បូងឃ្មុំ ៖ មានការផ្សព្វផ្សាយតៗគ្នានូវរូបភាពដួលរលំដើមពោធិ០១ដើមនៅតាមបណ្តាញព័ត៌មានសង្គមហ្វេសបុក (Facebook) ដែលមានខ្លឹមសារថា “បន្ទាប់ពីមានភ្លៀង ធ្លាក់ចំនួន២មេធំៗជាប់គ្នា ដោយលាយឡំជាមួយខ្យល់កន្ត្រាក់ផង នាថ្ងៃទី០៦ ខែឧសភា ឆ្នាំ ២០២១ វេលាម៉ោង៤និង៣០នាទីរសៀល បានបណ្តាលឱ្យដើមពោធិជើងខាល ប្រវត្តិស្នេហ៍ ទុំ និងទាវ ស្ថិតនៅភូមិជើងខាល ឃុំមង់រៀវ ស្រុកត្បូងឃ្មុំ ខេត្តត្បូងឃ្មុំ បានដួលរលំហើយ”។

រដ្ឋបាលខេត្តត្បូងឃ្មុំ ក្រោយពីទទួលបានព័ត៌មានខាងលើនេះភ្លាម រដ្ឋបាលខេត្តបានចាត់តាំងមន្រ្ដីឱ្យចុះទៅពិនិត្យដល់ទីតាំងផ្ទាល់ ហើយបានកត់សម្គាល់ឃើញថា ដើមពោធិដែលដួលរលំនោះមិនមែនជា «ដើមពោធិជើងខា ប្រវត្តិស្នេហ៍ទុំនិងទាវ»នោះទេ។ ក្នុងន័យនេះ រដ្ឋបាលខេត្តសូមប្រកាសបដិសេធនិងច្រានចោលទាំងស្រុងនូវរាល់ការចុះផ្សាយព័ត៌មានទាំងនោះ។

រដ្ឋបាលខេត្តត្បូងឃ្មុំ បានបញ្ជាក់ទៀតថាដើមពោធិដែលបានដួលរំលំខាងលើនេះមានឈ្មោះថា «ដើមពោធិលោកតាក្រហមក» ដែលមានចម្ងាយប្រមាណ៧០ម៉ែត្រ «ពីដើមពោធិជើងខាល ប្រវត្តិស្នេហ៍ ទុំ និងទាវ»។ ហេតុដូចនេះ ទើបបណ្ដាលឱ្យសាធារណជនមានការភ័ន្តច្រឡំ។ ប៉ុន្តែទោះបីយ៉ាងនេះក្តី រដ្ឋបាលខេត្តបានសហការជាមួយមន្ត្រីជំនាញ នឹងរៀបចំដាំដើមពោធិនេះឡើងវិញ ស្របតាមលក្ខណៈបច្ចេកទេសត្រឹមត្រូវដើម្បីថែរក្សាការពារបរិស្ថានបៃតង និងរក្សាប្រពៃណី ជំនឿ សាសនារបស់ដូនតាខ្មែរ៕